नेतूं कु खायूं

बान्दर अर बिराला सि जादा निर्भगि नेतूं कु खायूं,
मेरा प्रतापनगर म राजनीति कु आतंक मचायूं,

भुन्ना अर बान्दरूं पर इल्जाम मात्र लगायूं
निधि अर बिकास कु पैसा त चमचों न उडायूं,

लाचार जनता का अरमानूं कु त मजाक उडायूं
डोबरा चांठी पुल पर राजनीति कु ढोल बजायूं,

तिसाल गौं कि फैल कुजाण कै निर्भगि कु चबायूं
पम्पिंग कु पाणि अगली होलि मनोण तैं बचायूं,

दूर दूर कु सफर म हमारू दिमाग घुंघरायूं
मोटणा अर भल्डियाणा क बिच म चार देबतों तै झुलायूं

भारि भुखार म दूर दूर तैं भागण का दिन दिखायूं
होस्पिटल कि बिल्डिंगु कु जग्वालु कुजाणि कख लुकायूं,

समझ नि ओणु ओबीसी कु रथ म क्य थौं ल्यायूं
हे बिकास पुरुष हमारा बांटा कु कख च लुकायूं,

हमारा नेतुं न हमारा नौं माटा म मिलायूं
हमारा प्रतापनगर म राजनीति कु आतंक मचायूं ॥